أسمي عهود بن عون من دوز ولاية قبلي عمري 18 سنة نقرأ رابعة رياضة وننشط مع جمعية الامتياز الرياضي بدوز و نلعب مع المنتخب الوطني لليتكواندو بتونس.
شنوا تعنيلك المشاركة في المجتمع المدني؟
بالنسبة ليا كيافعة نعتبر المشاركة في المجتمع المدني هي طريق لفهم الآخر و توطيد العلاقات الاجتماعية و تتعلم كيفاش تعاون الناس و تبادر بالتطوع و تحس بغيرك.
شاركت قبل في الجمعيات ؟
نعم ،شاركت في الهلال الاحمر و شاركت في الجمعية الرياضية اللي أنا تو موجودة فيها.
الى اي مدى ساهمت مشاركاتك هذي في تغيير شخصيتك و نظرتك للحياة؟
اعطتني القوة باش نتقدم اكثر ونقدم اكثر ما عندي باش نفرض وجودي.
من وقتاش و انت تنشط في المجال الرياضي؟
من المرحلة الابتدائية نقرأ وقتها سنة خامسة ابتدائي عمري وقتها 11 سنة.
شنيا تمثلك رياضة التيكواندو؟
هي طريقي و حلمي و كل شي بالنسبة ليا باش نحقق بيها الهدف اللي نسعى له.
هل هي هواية ام العائلة اللي هي فرضت عليك باش تختار التيكواندو؟
هي حكاية غرام من الصغرة و اهلي شجعوني عليها.
معناها عايلتك مهمش ضد ممارستك للرياضة هذي؟
بالعكس اهلي هم أكثر الناس اللي وقفوا معايا و شجعوني ومعندهمش فرق بين البنت أو الولد في ممارسة الرياضة و خسروا عليا برشا فلوس باش وصلت اللي أنا فيه تو.
شنيا نظرة المجتمع ليك ؟
ياسر ناس مشجعيني و فما اللي ضد منهم اللي قالي في تعليق على تصويرة هبطتها و انا في مباريات في صفحتي الخاصة في الفيسبوك “كان مشيت للكوجينة خيرلك”.
في اول دخول ليك للجمعية و انت باش تشارك معاهم في الرياضة هذي هل واجهتي صعوبة في التاقلم مع زملاءك في الجمعية و الا مع مدربك؟
لا بالعكس اكثر فريق لقيتهم وقفوا معايا و شجعوني و ليهم الفضل زادا.
أهم التربصات اللي قمت بيهم في المسيرة هذي؟
زوز تربصات في روسيا واحد 2018 و لاخر2021.
شاركت في بطولات دولية ؟
لعبت بطولة دولية في تركيا وتربص في المغرب و بطولة العالم اواسط لعبتها باسم المنتخب.
طموحاتك المستقبلية؟
نطمح نشارك في اولمبيات باريس 2024 و نكون أول بنية في الجنوب و خاصة في دوز توصل للمرحلة هذي خاصة انه صعيب تلقى شكون وصلت للمرحلة هذي.
اخر كلمة تحب تقدمها
نحب نقدم شكر خاص و كبير برشا لعايلتي اللي شجعوني برشا و مدربي سي ” سعيد السنوسي” و اولاد بلادي (الذكور) اللي شجعوني في دوز موش معناها لبنات مشجعونيش لا بالعكس أما حبيت ناكد عليهم لأنه صعيب تلقى اولاد يشجعوا بنية في رياضة ذكورية و خويا لكبير اللي خسر عليا برشا و يصرف عليا و كان ليا اكبر سند.
سرور دخلاوي